Өскемен мен Семейде жаңа шағын аудандар пайда болады

Шығыс Қазақстан облысында жеке тұрғын үйлерден шағын аудандар пайда болады.

Бұл туралы облыс әкімі Даниал Ахметов халықпен есеп беру кездесуінде айтты.

Оның айтуынша, жеке тұрғын үй салу үшін жер телімін алуға облыстың 29 мың тұрғыны кезекте тұр.

Осы сұранысты қанағаттандыру үшін Семей мен Өскеменде жаңа тұрғын үй алаптары пайда болады. Өскемен қаласындағы No28 ауданға, Семей қаласындағы Ақсай, Үшақтар, Комсомол аудандарына ішкі және магистральдық желілерді қосу үшін ЖСҚ әзірленуде.

Биыл облыста жалпы ауданы 1,3 миллион шаршы метр тұрғын үй құрылысы жүргізілуде. Оның 400 мың шаршы метрі жыл соңына дейін пайдалануға берілуі тиіс.

Жаңа кварталдардағы үйлер 11 типтік жоба бойынша біртұтас архитектуралық стильде салынады. Осылайша әр ауданның өзіндік сәулеттік келбеті болады.