Атырау облысында 2018 жылы республикалық, облыстық және аудандық маңызы бар автомобиль жолдарын жөндеу жұмыстары жалғасады.
«Биыл облыстық және аудандық маңызы бар 60 шақырым жолды жөндеу жоспарлануда. Сондай-ақ Атырау – Астрахань және Атырау – Ақтөбе республикалық жолдарын қалпына келтіру жұмыстары басталады. Бұл жұмыстар алдағы көктемге жоспарланған. Сондай-ақ, қаланың 207 көшесіне және қала маңындағы елді мекендерге жаңадан жол төсеу үшін жобалық-сметалық құжаттама жасақталды. Олардың жалпы ұзындығы 220 шақырымды құрайды», — деді Атырау облысы жолаушылар көлігі және автомобиль жолдары басқармасының басшысы Әсет Оразғалиев.
2017 жылы облыста 86 шақырым облыстық және аудандық маңызы бар жол жөнделді. Сондай-ақ ауыл ішіндегі 267 шақырым жол төселді.
