Мереке алдындағы қоныс тойын еліміздің 18 миллионыншы тұрғыны сәби Мүслима Саматқызының отбасы тойлады.
Үш бөлмелі пәтердің кілтін облыс әкімі Амандық Баталов табыс етті, деп хабарлайды Алматы облысы әкімінің баспасөз қызметі.
18 миллионыншы тұрғынмен бірге Талдықорған қаласының Оңтүстік-Батыс ауданында «Нұрлы жол» мемлекеттік бағдарламасы аясында салынған 55 пәтерлік коммуналдық тұрғын үй мен 64 пәтерлік жалға берілетін тұрғын үйден баспаналы болған 100-ден астам талдықорғандық қоныс тойын тойлады. .
Жаңа қоныстанушыларды қуанышты оқиғамен облыс әкімі Амандық Баталов құттықтады.
«Мемлекет басшысы халықты қолжетімді баспанамен қамтамасыз ету мәселесіне үлкен көңіл бөлуде. Міне, бүгін Тұңғыш Президент күні қарсаңында Сіздерге жаңа пәтерлердің кілтін салтанатты түрде табыстап отырғаныма қуаныштымын. Баршаңызды өміріңіздегі осы қуанышты және көптен күткен оқиғамен шын жүректен құттықтаймын. Отбасыларыңызда татулық, келісім, жайлылық пен береке болсын», — деді Баталов.
