Қазіргі таңда Батыс Қазақстан облысында 32 мың адам баспана кезегінде тұр. Бұл туралы облыс әкімі Нариман Төреғалиев мәлімдеді.
«Биыл «Қуатты өңірлер – ел дамуының драйвері» ұлттық жобасы аясында тұрғын үй құрылысы мен пәтер сатып алуға 11,3 млрд теңге бөлінді. Өңірде бөлінген қаржыға 15 көппәтерлі тұрғын үй және ауылдық жерлерде 42 тұрғын үй, барлығы 2377 пәтердің құрылысы қарастырылған. Жыл қорытындысы бойынша 30 тұрғын үйді пайдалануға беру жоспарлануда, бұл 893 пәтер. Оның ішінде 7 көппәтерлі тұрғын үй Орал және Ақсай қалаларында болса, 23 тұрғын үйдің құрылысы ауылдық жерлерде жоспарланған», — деді Нариман Төреғалиев Орталық коммуникациялар қызметінде өткен баспасөз мәслихатында.
Сонымен қатар, оның айтуынша, халықтың әлеуметтік осал топтары үшін коммуналдық тұрғын үй қорынан тұрғын үй сатып алуға 1,7 млрд теңге қарастырылған. Бөлінген қаржыға Оралда 178 пәтер сатып алу жоспарлануда.
«Нәтижесінде тұрғын үй кезегінде тұрған азаматтар үшін 1071 пәтер пайдалануға беріледі», — деп түйіндеді спикер.
Дереккөз: inform.kz
