Солтүстік Қазақстан облысы, М.Жұмабаев ауданы, Сарытомар ауылында мемлекеттік бағдарлама бойынша салынған төрт үй бөлшектенді. Жағдайға облыс әкімдігінде түсініктеме берілді.
Әлеуметтік желіде ауылдан видео пайда болды.
Видео авторы қазіргі жағдайды түсінуді сұрайды. Оның айтуынша, қабырғалар былтыр сүріліп, әзірге ешқандай жұмыс жүргізілмеген.
Облыс әкімдігі бұл үйлердің құрылысына бюджет қаржысы игерілмеген деп сендірді. Кәсіпкер көшіп келушілерге үй салумен айналысқан.
«Нәтижелі жұмыспен қамту және жаппай кәсіпкерлік «Еңбек» бағдарламасы бойынша жеке кәсіпкер Сарытомар ауылында 2021 жылы МЖҚ-ға арналған үйлердің құрылысын бастады. Құрылыс жұмыстарының сапасы — іргетас құю және қабырғаларды қалау туралы ескертулерге байланысты құрылыс тоқтатылды. Осыдан кейін жеке кәсіпкер бой көтерген ғимараттарды бөлшектеуге бел буған. Ол қабырғаларды алып тастады, іргетасты бұзу мүмкін болмады. Жеке кәсіпкер Сарытомар ауылында үй салуға бюджет қаражатын алмаған», — деп түсіндірді облыс әкімдігінде.
Сарытомар ауылында 228 адам тұрады. Екі жылда халық саны 20 адамға өсті.
Дереккөз: inform.kz
