Семей қаласының Үшақтар өңірінде 20 көп балалы отбасыға баспана кілті табысталды
Семей қаласының әкімі Нұрбол Нұрсағатов «Көп балалы отбасы» аталымы бойынша мемлекеттік тұрғын үй қорында кезекте тұрған 20 отбасыға Үшақтар ауылындағы тұрғын үйлердің кілтін табыс етті.
Семей қаласы әкімдігінің хабарлауынша, салтанатты шараға «Аманат» партиясы облыстық филиалының жауапты хатшысы Сейілбек Ысқақов та қатысты. Бұл үйлер сатып алу құқығынсыз жалға берілетінін ескеріңіз.
«Бүгін Үшақтар ауылындағы Архат көшесінен 20 отбасы баспаналы болды. Жаңа тұрғындарды осындай атаулы күнмен шын жүректен құттықтаймын! Жаңа үйлер тұрғындарға береке мен қуаныш әкелсін!», – деді қала әкімі Нұрбол Нұрсағатов.
Айта кетейік, биылғы жылдың соңына дейін тағы 12 көп балалы отбасына Комсомольский кентінде салынған жаңа үйлердің кілті табыс етілмек.
Семей қаласында 13 мыңнан астам қала тұрғыны баспана кезегінде тұрған. Осыған орай, «Қарағайлы» ықшамауданында бюджеттік көпқабатты тұрғын үй құрылысын салу жұмыстары жүргізілуде. Осылайша, биылғы жылдың соңына дейін 200-ге жуық әлеуметтік осал және көп балалы отбасы баспаналы болмақ. Отбасыларды тұрғын үймен қамтамасыз етудің кешенді үлгісі жалғасады.
