Жамбыл облысының әкімдігі жыл соңына дейін екі мыңнан астам отбасын баспанамен қамтамасыз етуді жоспарлап отыр. Жыл басынан бері мыңнан астам отбасының баспанаға мұқтаждығы жабылды. Әкімнің айтуынша, халықтың әлеуметтік осал топтары мен көп балалы отбасылар үшін жалпы сомасы 7,6 млрд теңгеге 797 пәтер сатып алу жоспарлануда.
Қазіргі уақытта 123 пәтер сатып алынды. «Асар» бастамасы жобасы аясында көп балалы және аз қамтылған 49 отбасы баспаналы болды.
Облыста 3929 пәтерлік 74 тұрғын үйдің құрылысы қарқынды жүргізілуде. Ағымдағы жылдың жоспарында 1935 жаңа пәтер беретін 35 көпқабатты үйді аяқтау қарастырылған. Жылдың алғашқы айларында 10 тұрғын үй (579 пәтер) пайдалануға беріліп, олардың құрылысы бюджет қаражаты есебінен жүргізілсе, жеке инвестиция есебінен тағы 11 үй (474 пәтер) салынды.
Облыс әкімі қазіргі таңда тұрғын үй кезегінде 37,6 мың адам тұрғанын, оның 16,3 мыңы халықтың әлеуметтік осал топтары екенін атап өтті.
