Балқашта жаңа демалыс орындарын салу үшін жер телімдері ұсынылады
Туризмді дамыту, жердің қолжетімділігі, қажетті инфрақұрылымды жасау – осы және басқа да мәселелерді Қарағанды облысының әкімі Ермағанбет Бөлекпаев бизнес қауымдастығымен талқылады.
Кәсіпкерлік жөніндегі сараптамалық кеңестің кезекті отырысында Балқаш қаласы мен Қарқаралы өңірінде туризмді дамыту жоспарлары таныстырылды, деп хабарлады облыс әкімдігі.
– Балқаш біздің елдегі 20 басым туристік бағыттың қатарына енді. Оны дамытуға жеке инвестиция да, мемлекет қаражаты да салынады», – деді Ермағанбет Бөлекпаев.
Бүгінгі таңда Балқаш жағалауында 54 демалыс орны ашылды, биыл тағы 7 жаңа демалыс орны ашылады деп жоспарлануда. Бұл кәсіпке ақша салғысы келетіндерге мүмкіндіктер бар.
– Туризмді дамыту мақсатында Бертіс шығанағы аймағында инженерлік-коммуникациялық инфрақұрылымды тарту жұмыстары аяқталды. Сәуір айының соңына дейін демалыс орындарын салу үшін 14 жер телімін аукционға шығаруды жоспарлап отырмыз. Сонымен қатар, сол аумақта түгендеу жұмыстары жүргізіліп, 120 гектар бос жер анықталды. Қазіргі уақытта егжей-тегжейлі жоспар келісіліп жатыр. Одан кейін аукционға шығаруды да жоспарлап отырмыз», – деді Балқаш қаласының әкімі Сапар Сатаев.
Оның айтуынша, түгендеу қорытындысы бойынша Тораңғалық және Шұбар-Түбек курорттық ауылдарында да бос жер телімдері анықталған. Олар да алдағы уақытта аукцион арқылы ұсынылатын болады.
Олар 2025 жылға қарай Балқашқа туристер ағынын төрт есе, яғни 170 мың адамға дейін ұлғайтпақ. Демалушыларды тарту үшін биыл желкенді регата қайта жалғасады.
Қарқаралы ауданының әкімі Әділжан Арғынов этникалық және агротуризмді дамыту жоспарларына тоқталды.
Кәсіпкерлер өз ұсыныстарын айтты, олар да ескерілетін болады.
Сараптамалық кеңес өңірдегі бизнес-климатты жақсартуға әсер ететін басқа да мәселелерге де назар аударды. Қарағанды қаласының әкімі Мейрам Қожухов қала құрылысының егжей-тегжейлі жобаларын таныстырды.
Кәсіпкерлер агроөнеркәсіптік кешен, құрылыс және тұрғын үй-коммуналдық шаруашылық, жер қойнауын пайдалану салаларындағы мәселелерді өңірлік деңгейде шешуді талап етті.
