Наурыз мейрамында Орал қаласындағы Зачаганск ауылында 9 қабатты жаңа тұрғын үй пайдалануға берілді.
Пәтер кілттерін табыстау рәсіміне Батыс Қазақстан облысының әкімі Нариман Төреғалиев қатысты. Аймақ басшысы жиналғандарды Наурыз мерекесімен құттықтап, жаңа қоныстанғандарға бақыт тіледі.
— Мемлекет басшысы Қасым-Жомарт Тоқаев халыққа Жолдауларында халықтың әл-ауқаты мен өмір сүру сапасын арттыру мемлекеттің басты міндеті екенін атап өтті. Сондықтан мұқтаж әрбір отбасын баспанамен қамтамасыз етуге бағытталған бастамалардың маңызы ерекше. Қазір Оралда мемлекеттік бағдарламалар аясында 14 көпқабатты тұрғын үй салынуда. Мемлекеттік бағдарлама бойынша салынған көпқабатты тұрғын үйлер кезекте тұрғандарға «Отбасы банкі» арқылы жеңілдетілген пайызбен беріледі. Бүгінде 80 отбасы кезекте тұр. Пәтер иелерін қоныс тойларымен құттықтаймыз. «Наурыз баршаңызға құт-береке әкелсін!» – деді облыс басшысы.
Елбасының тапсырмасы бойынша Қазақстанда «Қуатты аймақтар – ел дамуының драйвері» жобасы жүзеге асырылуда. Осы жоба аясында жаңа тұрғын үйлердің құрылысы жүргізілді.
Жаңа қоныстанғандардың дені мүмкіндігі шектеулі жандар, кезекте тұрғандар.
— Біз бірнеше жыл кезекте тұрдық. Мемлекетке алғысымды білдіремін, енді жаңа баспанаға қол жеткіздік. Бақытта шек жоқ, баршаңызды Наурыз мерекесімен құттықтаймын! — деп атап өтті жаңа тұрғын Нұргүл Есеналиева.
Айта кетейік, Оралда 2024 жылы 1400-ден астам пәтер пайдалануға беріледі деп жоспарлануда.
Дереккөз: inform.kz
