«Баспана Хит» ипотекалық бағдарламасы бойынша пайыздық мөлшерлеме 11,25%-дан 10,75%-ға дейін төмендетілді, деп хабарлайды Қазақстанның тұрақтылық қоры.
Сыйақы мөлшерлемесінің өзгеруі Қазақстан Республикасы Ұлттық Банкінің (бұдан әрі – ҚРҰБ) базалық мөлшерлемені 9,5%-дан 9%-ға дейін төмендету туралы шешімін жариялауына байланысты болды. Естеріңізге сала кетейік, «Баспана Хит» бағдарламасы бойынша жылдық сыйақы мөлшерлемесінің мөлшері ҚРҰБ базалық мөлшерлемесіне байланысты (ҚҰБ базалық мөлшерлемесі + 1,75%).
Бұл бағдарлама бойынша мөлшерлеме ипотекалық қарыз шартын жасау кезінде бекітіледі және клиент үшін өзгеріссіз қалады. Осыған байланысты пайыздық мөлшерлеменің өзгеруі тек жаңа қарыз алушыларға ғана әсер етеді.
«Баспана хит» бағдарламасының шарты бойынша 300 млрд теңгеге несие беру жоспарланса, бүгінгі таңда оның 224 млрд теңгесі игерілді.
