Оңтүстік Қазақстан облысында инвесторлар екі күн электр стансасын салады
Оңтүстік Қазақстан облысының әкімі Жансейіт Түймебаев өңірдегі ірі жобаларға инвестиция құюға ниетті Германия және Нидерланды инвесторларымен кездесті.
Бұл туралы Оңтүстік Қазақстан облысы әкімінің баспасөз қызметі хабарлады.
Жиында шетелдік кәсіпкерлердің жобасымен танысқан аймақ басшысы өңірдің экономикалық әлеуеті мен инвесторларға мемлекет тарапынан жасалып жатқан жеңілдіктерге тоқталды.
«Үш миллионға жуық халқы бар өңір үшін бұл жоба өте құптарлық әрі тиімді. Біз электр энергиясының 65 пайызын сырттан аламыз. Облыс тұрғындарының жазғы уақытта 350-370 МВт, ал қыста 450-480 МВт электр энергиясына қажеттілігі. Сондықтан мұндай жобаларды жүзеге асыруымыз керек. Біздің облыстың климаты күннен электр энергиясын өндіруге өте қолайлы», – деді Түймебаев.
Өз кезегінде шетелдік кәсіпкерлер Мақтаарал өңірінде екі күн электр стансасы мен асфальт-бетон зауытын салуға ниетті екендіктерін жеткізді. Сонымен қатар, олар баса айтты тиісті құжаттарды ресімдеу үшін жергілікті билік тарапынан қолайлы жағдайлар жасалғаны туралы.
«KADI Company» ЖШС бас директоры Мұрат Даврасовтың айтуынша, Қазақстанда бірқатар жобаларды жүзеге асырған немістің NwComp Solar GmbH компаниясы күн электр стансасының құрылысына 7 миллион еуро инвестиция құюда.
Айта кету керек, Жетісай қаласындағы полигон аумағында қуаттылығы 4,8 МВт болатын электр станциясы салынады. Бүгінгі күні рұқсат құжаттары әзірленді, құрылыс жұмыстарын ағымдағы жылдың қараша айында бастау жоспарлануда.
Екінші жобаның инвесторы ретінде голландиялық VTK Investments компаниясы шықты. Бүгінде аталған жоба аясында қуаттылығы 100 МВт күн электр стансасын салу бойынша екіжақты меморандумға қол қойылып, 300 гектар жер телімін бөлу бойынша тиісті жұмыстар жүргізілуде. Жобаның құны 150 миллион еуроны құрайды. Қазір бұл компания Ақмола облысында да дәл осындай жобаны жүзеге асыруда.
