Петропавлға кіре берістегі көпірді қалпына келтіру жұмыстары қашан аяқталады?
Солтүстік Қазақстан облысының әкімі Құмар Ақсақалов эстакаданы қалпына келтіру жұмыстарын келесі жылдың тамыз айында аяқтауды тапсырды.
Петропавлға кіре берістегі көпірді қалпына келтіру жұмыстары биылғы көктемде басталды. Тамыз айында ол толығымен жабылды. Қазан айына дейін оның бір бөлігі жөнделіп, жаяу жүргіншілер мен жеңіл көліктер мен қоғамдық көліктердің жүруіне рұқсат етілді.
Эстакада жұмысы жалғасуда. «Қазавтожол» филиалының директоры Болатбек Айтпаев алдағы жылы игерілуге тиіс 395,7 миллион теңге қалғанын айтты.
Бұл қаражатқа мердігер көпірдегі жұмыстың барлық түрін аяқтайды.
Кестеге сәйкес қайта құру 2018 жылдың қараша айында аяқталуы тиіс. Бірақ «Қазавтожол» филиалының директоры аймақ басшысын жұмыс ертерек аяқталады деп сендірді.
