Конституция күніне орай Қонаевта пәтер кілттері табыс етілді
Алматы облысында Конституцияның 30 жылдығына арналған салтанатты шара өтті. Қонаев қаласының тұрғындарына пәтер кілттері табыс етілді. 42 отбасы қоныс тойын тойламақ. Бұл туралы облыс әкімдігі хабарлады.
Қуанышты жаңа тұрғындардың қатарында көп балалы отбасылар, жетім балалар мен әлеуметтік жағынан осал азаматтар бар. Пәтер кілттерін қала әкімі Асхат Бердіханов өзі тапсырды.
Оның айтуынша, алдағы жылдары жалпы ауданы 161 мың шаршы метр болатын 72 тұрғын үй салынады. Құрылыстың белсенді қарқынының арқасында тұрғын үй кезегі жылдам қозғалуда. Облыс орталығы мәртебесін алғаннан бері 193 отбасы пәтерге ие болды. Биылдың өзінде – 108.
Қарлығаш ықшамауданында көп балалы, жетім және кезекте тұрғандар баспаналы болды. Оларға 18 үй, 24 пәтер берілді. Осылайша, Конституция күні Қонаевтағы 42 отбасы пәтер кілтіне ие болды. Жыл соңына дейін 200-ден астам отбасы баспаналы болмақ.
Тұрғын Динара Таурбаева ерекше эмоцияны басынан өткерді. Мүмкіндігі шектеулі екі баланы тәрбиелеп отырған ол бірнеше жылдан бері кезегін күтіп жүр.
Берілген пәтерлер мен үйлер кейіннен сатып алу құқығымен қамтамасыз етіледі. Бастапқы төлемді жасағаннан кейін тұрғындар жылжымайтын мүлікті жеке меншік ретінде тіркей алады.
Бүгінде Қонаев қаласының 3,8 мыңнан астам тұрғыны баспана кезегінде тұр. Кезекте тұру үшін «Отбасы банкі» филиалы арқылы өтініш беру керек.
Еске салайық, Ата Заңымыздың 30 жылдығы қарсаңында Қошы қаласында да айтулы оқиға орын алып, 371 пәтер одан әрі үлестіру үшін банкке берілді.
