Бізге әлеуметтік тұрғын үйлерді көбірек салу керек – Гауһар Танашева
ҚР Парламентіндегі «Жібек жолы» телеарнасының студиясында Мәжіліс депутаты Гауһар Танашева халықтың әлеуметтік топтары үшін мүмкіндігінше тұрғын үй салу керектігін айтты.
«Бізге әлеуметтік үйлерді көбірек салу керек. Қазір бұл жеткіліксіз. Бұл мәселені бөлек қарастырған жөн. Өйткені шаршы метр (тұрғын үй – авт.) жетпейді. 9 адамдық пәтерде тұратын отбасылар бар. Олар ипотекаға қол жеткізгеніне қуанышты. Ал олар небәрі 30-40 шаршы метрлік пәтер алады. Мұндай көп балалы отбасы үшін бұл өте аз деп ойлаймын. Мәселенің осы жағын да ескерген жөн», – деді Гауһар Танашева.
Депутат өзі көп балалы ана болғандықтан, халықтың әлеуметтік осал топтарына баспана мәселесін шешу қаншалықты қиын екенін өз көзімен біледі.
«Мысалы, мен де көп балалы анамын. Күйеуім 2021 жылы қайтыс болды. Қазіргі таңда мүмкіндігі шектеулі баланы өз бетімше тәрбиелеп жатырмын. Сондықтан, баспана мәселесі бар мұндай отбасылардың мәселесін өз көзіммен білемін. Осының барлығын өз басымнан өткердім», – деп атап өтті Гауһар Танашева.
Депутат олардың отбасында баспана мәселесі қалай болғанын айтты. Оның айтуынша, барлығы бір бөлмелі пәтерден басталды, содан кейін үш бөлмелі пәтер пайда болды. Енді ғана бұл отбасы 4 бөлмелі тұрғын үйге қол жеткізді.
«Алғаш пәтер алған кезде көп балалы аналарға ондай көмек болған жоқ. 2019 жылға дейін барлық балаларға әлеуметтік көмек шамамен 10 мың теңгені құрады. Қазір жағдай аздап жақсарды, бірақ бұл жеткіліксіз», – деп түйіндеді сөзін Гауһар Танашева.
