ҚР Ұлттық банк төрағасы Данияр Ақышев елімізде неліктен табиғи апаттар мен техногендік бұзылулардан тұрғын үйді міндетті сақтандыру енгізілмейтінін түсіндірді. Бұл туралы ол Сенат отырысында депутаттардың сауалдарына жауап бере отырып мәлім етті, деп хабарлайды тілшісі. Todai.kz .
Сенатор Әлімжан Құртаев Қазақстанда табиғи апаттар аз емес екенін айтты. Су тасқыны, жер сілкінісі, дауыл, дала өрттері және басқа да табиғат құбылыстары адамдардың үйлерін қиратады немесе зақымдайды. Техногендік құбылыстар да осындай салдарға әкеледі. Ол Ұлттық банк басшысынан елімізде мұндай оқиғалардан тұрғын үйді міндетті сақтандыруды енгізу мүмкіндігі қарастырылып жатыр ма деген сұрақ қойды.
Данияр Ақышев бұл мәселенің үкімет пен қаржылық реттеуші тарапынан талқыланғанын, бірақ шенеуніктер ортақ шешімге келмегенін атап өтті.
«Өкінішке орай, бұл мәселе соңғы жылдары шешімін тапқан жоқ: Қазақстанда жылдам енгізілетін шетелдік тәжірибенің бірде-бір үлгісі жоқ. Ол республиканың үлкен аумағымен, әртүрлі аймақтарға тән түрлі апаттық тәуекелдермен байланысты және, тиісінше, қоғамымыздың барлық азаматтары үшін әділ тарифті жылдам есептей алмау. Оның үстіне, бұл біздің үй шаруашылықтарының күнделікті шығындарына қаржылық ауыртпалық түсіру мәселесін тудырады», — деп түсіндірді ол.
Сонымен бірге ол халықаралық ұйымдар мен сарапшылардың қатысуымен бұл бастаманы қайта қарауға дайын екенін мәлімдеді.
