Үкімет су тасқынынан зардап шеккен тұрғындарға қолдау көрсету және тұрғын үйлерді қалпына келтіру бойынша жүргізіліп жатқан жұмыстарды үнемі қадағалап отырады.
34 068 отбасына 100 АЕК көлемінде біржолғы өтемақы төленді. Бұл мақсаттарға барлығы 12,5 миллиард теңгеден астам қаржы бөлінді. Бағалау аяқталғаннан кейін жоғалған маңызды заттарды сатып алу үшін 150 АЕК-ке дейін қосымша төлемдер жасалады. Бүгінгі таңда 21 800 отбасы жалпы сомасы 9,9 млрд теңгеге тиісті өтемақы алды.
Қазіргі уақытта барлық облыстарда тұрғын үйлер мен саяжайларды тексеру және бағалау жұмыстары толығымен аяқталды. Су тасқынынан зардап шеккен қазақстандықтарға 4790 салынып, сатып алынған үйлер мен пәтерлер берілді.
Осылайша, 323 жаңа үй салынып, пайдалануға берілді. Солтүстік Қазақстан облысында – 235 отбасы, Қостанай облысында – 57, Ақтөбе облысында – 26, Павлодар облысында – 5 отбасы баспана кілтін алды. Су тасқынынан зардап шеккен өңірлерде барлығы 2568 үй салу жоспарлануда. күзге дейін аяқталып, тұрғындар игілігіне тапсыру жұмыстары жеделдетілген қарқынмен жүргізілуде.
Қайталама нарықта 4467 үй мен пәтер сатып алынып, қираған тұрғын үйлердің орнына отбасыларға берілді. 315 тұрғын үй Қостанай, 219 – Ақмола, 1372 – Атырау, 447 – Ақтөбе, 1102 – Солтүстік Қазақстан, 1004 – Батыс Қазақстан, 6 – Қарағанды және 2 – Павлодар облыстарының тұрғындарына берілді.
Комиссия шешімдерінің нәтижесінде 8 717 отбасы тұрғын үйді жөндеу және қалпына келтіру үшін жалпы сомасы 48,2 млрд теңгеге өтемақы алды.
Сонымен қатар, зардап шеккен кәсіпорындарға өтемақы төлеу жұмыстары жүргізілуде. Өңірлік комиссиялар ШОБ субъектілерінен жалпы сомасы 5,8 млрд теңгені құрайтын 374 өтінішті қарап, мақұлдады. Өлген малға мемлекет тарапынан көрсетілген көмек көлемі 2,8 миллиард теңгеден асты.
Дереккөз: inform.kz
