Елбасы «Бәйтерек» холдингінің қызметін жетілдіру бойынша бірқатар тапсырмалар берді
Мемлекет басшысы «Бәйтерек» ұлттық басқарушы холдингі» АҚ басқарма төрағасы Нұрлан Байбазаровты қабылдады, деп хабарлайды info.homsters.kz, akorda.kz сайтына сілтеме жасап.
Қасым-Жомарт Тоқаевқа холдингтің 2023 жылдың 9 айындағы қызметінің қорытындылары, соның ішінде кәсіпкерлік пен ауыл шаруашылығы саласын қолдау, сондай-ақ халықты тұрғын үймен қамтамасыз ету жұмыстары туралы баяндалды.
Мемлекет басшысына ұсынылған мәліметтерге сәйкес, инвестициялық жобаларды қаржыландыру көлемі 511 млрд теңгені құрады, жалпы несие сомасы 1 трлн теңгеге жуық шағын және орта бизнестің 18,1 мың жобасы қолдау тапты. Ауыл шаруашылығы саласын қаржылық қолдау 447 млрд теңгені құрады. Ағымдағы жылдың 9 айының қорытындысы бойынша 811,2 мың ш.м. тұрғын үй, 47 мыңға жуық отбасы жаңа баспанаға ие болды.
Мемлекет басшысына холдингті трансформациялау және цифрландыру бойынша қабылданып жатқан шаралар туралы да баяндалды. Екі жыл ішінде «Бәйтерек» экономиканың шикізаттық емес секторын қолдау көлемін екі есеге арттырмақ. Өңдеу өнеркәсібі жобаларын несиелендіруге инвестиция тарту және коммерциялық банктерді тарту бойынша жұмыс күшейтілетін болады.
Ішкі нарықты қанықтыру және аграрлық сектордың экспорттық әлеуетін арттыру мақсатында тамақ өнеркәсібі жобаларын қаржыландыру бағдарламалары іске қосылады, толыққанды экспорттық несие агенттігі құрылады.
Мемлекет басшысының тапсырмасын орындау шеңберінде холдингтің тұрғын үй бағыты моноқалалардың, аудан орталықтарының және ауылдардың тұрғындарын тұрғын үймен қамтамасыз ету қажеттілігін ескере отырып қайта құрылатын болады.
Нұрлан Байбазаров холдингтің еншілес компанияларының барлық қызметтерін цифрлық форматқа көшіру жоспарланып отырғанын айтты.
Кездесу қорытындысы бойынша Қасым-Жомарт Тоқаев экономикалық өсуді қолдау мен азаматтардың өмір сүру сапасын жақсартудың жаңа тәсілдерін енгізудің маңыздылығын атап өтті, сондай-ақ «Бәйтерек» холдингінің қызметін жақсарту бойынша бірқатар міндеттер қойды.
