Қазақстан Президенті Нұрсұлтан Назарбаев облыс әкімдеріне олардың жұмысының сапасы қазақстандықтарды баспанамен қамтамасыз ету деңгейіне қарай бағаланатынын ескертті.
Мемлекет басшысы жыл сайынғы Қазақстан халқына Жолдауында шенеуніктерге азаматтарды жеке баспанамен қамтамасыз етудің маңыздылығын еске салды. Елбасының айтуынша, халықтың өмір сүру деңгейі мен сапасы осыған тікелей байланысты, деп хабарлайды Sputnik .
Осы мақсатта «Нұрлы жер» және «7-20-25» мемлекеттік бағдарламалары қолға алынғанымен, өңірлерде жұмыс нашар жүргізілуде.
«Бар болғаны екі мың (өтінімдер — Sputnik ) бекітілген. Өтініш берушілер жоқ па, әлде мұндай шарттар жоқ па? Банктер таба алмай жатыр ма? Соны анықтап көрейік», — деді Қазақстан басшысы және министрлер кабинетінің мүшелеріне 50 шаршы метрлік бір бөлмелі пәтердің құны туралы сұрақ қойды.
Қазақстан Президентінің жолдауының тікелей бейне трансляциясы
Аудиторияның жауаптары әртүрлі болды — үш миллионнан жеті миллионға дейін. Президент министрлердің жауабына көңілі толмады.
«Үкімет жұмыс істемейді, Бақытжан (Сағынтаев, ҚР Премьер-Министрі — Sputnik ). Әкімдер жұмыс істемейді. Мен барлық әкімдерге өтініш: тағы не керек? Адамдарға жақсылық жасау үшін не қажет? Бәрін берді», – деп ашуланған Нұрсұлтан Назарбаев әкімдерге жыл соңында олардың қызметіне баға халықтың тұрғын үймен қамтамасыз етілу деңгейіне қарай қалыптасатынын ескертті.
Нақты мысал ретінде мемлекет басшысы Астана қаласының экс-әкімі Әсет Исекешевтің жергілікті бюджеттен жеңілдетілген ипотека бойынша бастапқы жарналарды ішінара субсидиялауды енгізуге қол жеткізген жұмысын мысалға келтірді. Елбасы білікті ұстаздар мен дәрігерлерге тұрғын үй несиесін беруге баса назар аударуды тапсырды.
Сонымен қатар, Қазақстан басшысы ірі қалаларда халықтың әлеуметтік қорғалмаған топтары үшін жалға берілетін тұрғын үй құрылысын арттыруды тапсырса, Назарбаев еш жерде тегін пәтерлер болмау керектігін қадап айтты.
Дұрыс болған жағдайда жергілікті атқарушы органдардың жұмысы бес жылда 650 мың отбасы, яғни екі миллионнан астам қазақстандықтардың тұрмыстық жағдайын жақсарта алады.
