Қазақстанда 1,3 миллионға жуық жас жеке тұрғын үй кеңістігіне мұқтаж
Бұл туралы «Астана жастары» орталығында ұйымдастырылған жастармен кездесуде «Отбасы» банкінің басшысы Ләззат Ибрагимова айтты.
Шара «Демографиялық өсім – ұлттың бәсекелестік артықшылықтарының негізі» тақырыбындағы үкімет сағатына дайындық жұмыстары аясында ұйымдастырылды. Қатысушылар қатарында ҚР Парламенті Сенатының депутаттары да болды, отырысқа сенатор Нұртөре Жүсіп модераторлық етті, деп хабарлайды «Отбасы банкі» АҚ баспасөз қызметі.
Өткен жылы «Бәйтерек» холдингінің құрамына кіретін «Отбасы» банкінің күш-жігерінің арқасында 35 жасқа дейінгі 24 мыңнан астам қазақстандық жас қоныс тойын тойлауға мүмкіндік алды.
Тұрғын үй құрылысын қолдау бағдарламасы аясында қазақстандық жастар негізінен бір бөлмелі және екі бөлмелі пәтерлерді таңдады, мұндай пәтерлердің құны орта есеппен 19,7 миллион теңгеге жетті. Оларды сатып алуды қаржыландыру үшін берілген несиелердің жалпы көлемі 414 млрд теңгені құрады.
Осылайша, осы айдағы жағдай бойынша банк статистикасы бойынша 18 бен 35 жас аралығындағы тағы 1,3 миллион қазақстандық баспанаға мұқтаж.
Әсіресе, облыстар мен моноқалаларда мәселе өткір тұр. Лайықты жұмыс пен тұрғын үй жағдайының жоқтығынан жастар үлкен қалаларға қоныс аударуда. Соңғы 5 жылда бұл үрдіс күшейе түсті. Халық санының ең көп өсімі Астана, Алматы, Шымкент және Ақтөбе облысында байқалады.
Жастарды қолдау және ішкі көші-қонды азайту мақсатында «Отбасы банкі» қалалар мен облыстардың әкімдіктерімен бірлесіп, жастарға арналған арнайы тұрғын үй бағдарламасын қолға алды.
Ол алғаш рет 2017 жылы Алматыда басталды. Содан кейін алғашқы 100 қатысушы «Алматы жастары» аясында қоныс тойын тойлады. Одан кейін жобаға елорда мен басқа да өңірлер қосылды. Жастар бағдарламасы жұмыс істеген 7 жыл ішінде 5 400 жас қазақстандықтар ел бойынша қоныс тойын тойлауға мүмкіндік алды. Жобаны жүзеге асыруға «Отбасы банкі» 22,5 млрд теңге, жергілікті әкімдіктер 75,4 млрд теңге бөлді. Соның арқасында жастарды жеңілдетілген несиелендіру бағдарламасының бюджеті 98 млрд теңгені құрады.
Жастарға арналған бағдарламалар Алматы, Астана, Ақтөбе, Алматы, Атырау, Жамбыл, Жетісу, Батыс Қазақстан, Қарағанды, Қостанай, Қызылорда, Маңғыстау Абай, Ұлытау және Павлодар облыстарында іске қосылды.
Бағдарламаға 35 жасқа толмаған кез келген Қазақстан азаматы қатыса алады. Егер біз отбасы туралы айтатын болсақ, онда ерлі-зайыптылардың біреуі ғана қатыса алады. Өтініш беру кезіндегі ресми жұмыс өтілі аймаққа байланысты 6 айдан 12 айға дейін болуы керек. Сонымен қатар, адам соңғы 5 жыл ішінде жылжымайтын мүлікке ие болмауы керек.
Банк баспана құнын шектемейді, тек несие сомасының жоғарғы шегі бар. Аймаққа қарай 10 миллионнан 20 миллион теңгеге дейін. Таңдалған нұсқа қымбатырақ болса, онда бағдарламаға қатысушылар несие сомасы мен тұрғын үй бағасы арасындағы айырмашылықты өздері өтейді.
Жастар бағдарламасы бойынша бастапқы жарна 10%, ал сыйақы мөлшерлемесі жылдық 5%-дан (GESV – 5,2%-дан) құрайды. Ипотеканың максималды мерзімі 19 жылға дейін.
Сондай-ақ, жас қазақстандықтар бағдарламалардан тыс, нарық жағдайында тұрғын үй сатып алу үшін «Отбасы банкіндегі» депозиттеріне белсенді түрде ақша жинақтауда.
Банк салымшыларының 30 пайыздан астамы 35 жасқа дейінгі жас қазақстандықтар. Олардың ең үнемділері Алматы, Астана және Шымкентте тұрады.
Биыл «Отбасы банкі» қазақстандық жастарды қолдау жобаларын жүзеге асыруды жалғастырады.
Осы бағыттағы жұмысты тиімдірек ету үшін банк облыс әкімдіктерін облыс орталықтарында, моноқалалар мен ауылдарда жастарды баспанамен қамтамасыз ету үшін облыстық бюджетке жыл сайын және тұрақты негізде қаражат бөлуге шақырады.
Бюджетке түсетін әлеуметтік жүктемені азайту және өңірлерде жұмыс істейтін жастарды ұстап тұру үшін «Отбасы Банкі» жыл сайын ірі кәсіпорындарға «Корпоративтік» өнім аясында «Отбасы Банкімен» ынтымақтастық орнату мүмкіндігін ұсынады.
Шынында да, статистикалық мәліметтерге сүйенсек, Қазақстанның моноқаласында 230 мыңнан астам адам жұмыс істейтін, оның ішінде 35 жасқа дейінгі жастарды қамтитын 47 ірі кәсіпорын бар.
– Біз жас қазақстандықтарды және олардың отбасыларын қолдауға арналған «9-20» қосымша бағдарламасын әзірледік. Наурыз айында іске қосуды жоспарлап отырмыз. Жас қарыз алушылар үшін тұрғын үйдің қолжетімділігін бағалау кезінде несие сыйақысының мөлшерінен гөрі бастапқы жарнаның мөлшері маңыздырақ. Ең бастысы, жас отбасы өз өміріндегі алғашқы ортақ меншікті – тұрғын үйді құруда», – деп атап өтті «Отбасы Банкі» АҚ басқарма төрайымы Ләззат Ибрагимова.
Қазақстанда 9 пайыздық мөлшерлемемен «Отау» жаңа тұрғын үй бағдарламасы басталады.
