Алматыда 2023-2024 жылдар аралығында жетім балаларға 440 пәтер беріледі. Бұл туралы Бостандық ауданының тұрғындарымен кездесуінде қала әкімі Ерболат Досаев мәлім етті.
Аудан тұрғыны статистика бойынша бес жылда қалада жетім балаларға 246 пәтер берілгенін айтты.
«Бұл мәселені шешудің қандай да бір жолы бар ма?» — деп сұрады ол.
«Иә, бізде баспана мәселесі бар. Тұрғын үйлерді пайдалануға беруде біраз кешігулер болды. Биыл бюджетті қайта бөлу күтілуде. Мәслихаттан сұрадым, олар мені қолдап, тұрғын үй құрылысына қосымша қаражат бөлді. Бірінші кезең бойынша биыл жетім балаларға 40 пәтер беріледі. Одан кейін 2000 пәтер сатып алуды жоспарлап отырмын, оның 20 пайызы 2023-2024 жылдар аралығында жетім балаларға беріледі – бұл 400 пәтер», — деді әкім.
Ерболат Досаев Бостандық ауданындағы балабақшалардың жетіспейтіні туралы да жауап берді.
«Балалар үйінің құрылысы бойынша жұмыстар жүргізілуде. Ол жерге 440 орындық балабақша салғалы жатырмыз. Жоба дайын. Жобалық-сметалық құжаттары біткен бойда балабақша саламыз. Бұл аудандағы балабақша мәселесін шешеді деп ойлаймын», — деді қала әкімі.
