Петропавл тұрғыны жарты жылдан бері басынан өткерген тұрғын үйді жекешелендіру мәселесімен Солтүстік Қазақстан облысы бойынша Мемлекеттік қызмет істері департаментіне жүгінді. Оның қала әкімдігіне жазған өтініші белгісіз себептермен қаралмаған.
Ведомствоның баспасөз қызметінің хабарлауынша, наурыз айында қала тұрғыны «электрондық үкімет» порталы арқылы тұрғын үй-коммуналдық шаруашылық бөліміне мемлекеттік тұрғын үй қорынан пәтерді жекешелендіруге өтініш жолдаған. Алайда оның өтінішін мемлекеттік орган жарты жылдан астам уақыт бойы қараған жоқ.
«Мемлекеттік тұрғын үй қорынан тұрғын үйлерді жекешелендіру» мемлекеттік қызметін көрсету ережеге сәйкес үш кезеңнен өтеді. Бірінші және екінші кезең тұрғын үй комиссиясының өтініш берушіден құжаттарды алғаннан кейін күнтізбелік 30 күн ішінде тұрғын үйді жекешелендіру туралы шешім қабылдауынан тұрады. Одан кейін үшінші кезеңде көрсетілетін қызметті беруші мен өтініш беруші арасында бес жұмыс күні ішінде тұрғын үйді жекешелендіру туралы шарт жасалады. Халыққа қызмет көрсету бөлімінің бас маманы Нұргүл Жанмурзина бұл өтініштің жұмысқа қабылданбауына неліктен ТКШ бөлімінің қызметкерлерінен де, басшылығынан да түсініктеме берілмегенін айтты.
Қала тұрғыны тұрғын үй-коммуналдық шаруашылық бөлімі өтінішті қарап шыққан соң, тұрғын үйді жекешелендіруге келісімін алған.
