Қарағанды университетінің 13 жас ғалымы «Жас Ғалым» бағдарламасы бойынша пәтер иесі атанды
Өткен жылдың желтоқсан айында «Отбасы Банкі» жас ғалымдарға арналған «Жас Ғалым» жаңа тұрғын үй бағдарламасын – жеңілдікті ипотеканы бастады. Бүгінгі таңда академик Е.Ә.Бөкетов атындағы Қарағанды университетінің 13 оқытушысы баспана сатып алды, тағы жетеуі мақұлдау рәсімінен өтуде, деп хабарлайды Қарағанды облысы әкімдігінің баспасөз қызметі.
Университетте атап өтілгендей, жеңілдетілген ипотека алған әрбір адам белсенді ғылыми жұмыстармен айналысады. Мәселен, бейорганикалық және техникалық химия кафедрасының доценті Нұрғали Жәніқұлов стоматологияға қажетті мырыш-фосфатты цементтерді зерттеп жатыр. Археология, этнология және ұлттық тарих кафедрасының аға оқытушысы Мәкен Әділ археологиялық қазбалар мен материалдарды үстелдік өңдеу жұмыстарын жүргізеді.
«Жас Ғалым» бағдарламасы бойынша пәтердің тағы бір бақытты иесі Конституциялық және халықаралық құқық кафедрасының доценті, PhD докторы Алмаз Жексекин болды. Ғалым көптен бері өз үйін сатып алғысы келген, бірақ бағдарлама болмаса, өзі айтқандай, арманы жақын арада орындалмас еді.
– Жұбайым екеуміз екі бала тәрбиелеп отырмыз, ата-анамызбен бірге тұрамыз. Әйелім де университетте жұмыс істейді. Өткен жылы мен баспана іздедім, бірақ әлі оған қолым жетпейтінін түсіндім. Бағдарлама туралы білгенде бірден қатысуға шешім қабылдадым. Құжаттарды жинадым, өтініш тез қабылданды. Бағдарламаның арқасында жаңа ғимараттан үш бөлмелі пәтер сатып алдым. Қазір жөндеу жұмыстарын жүргізіп жатырмыз, жақын арада қоныс тойын тойлаймыз деп отырмыз», – дейді Алмаз Жексекин.
Ғылыми ұйымдар мен жоғары және жоғары оқу орнынан кейінгі білім беру ұйымдарының 40 жасқа дейінгі жас ғалымдары «Жас Ғалым» бағдарламасы бойынша баспана сатып ала алады. Сізде кемінде магистр дәрежесі, кемінде үш жыл ғылыми жұмыс тәжірибесі болуы керек және баспана қажет. Жеңілдікті ипотека бойынша бастапқы жарна 10%, несие беру мөлшерлемесі жылдық 5%. Бағдарлама 2027 жылға дейін жұмыс істейді.
