Түркістан облысында модульдік құрылыс саласында келісімдерден нақты өндірістік процестерге көшті. Кіші индустриялық парк базасында капсулалық үйлер мен заманауи сэндвич-панельдер өндірісі жолға қойылды. Жоба облыс әкімдігінің қолдауымен және 2025 жылы өткен іскерлік келіссөздер нәтижесінде қалыптасқан халықаралық әріптестік аясында іске асырылуда, – деп хабарлайды Түркістан облысы әкімдігінің баспасөз қызметі.
Зейнетақы жинақтарын пайдаланып тұрғын үй сатып алу ережелері өзгерді
Шетелдік тәжірибеден – жергілікті өндіріске
Жобаның негізіне Түркістан облысы делегациясының Қытай Халық Республикасына жасаған ресми сапары барысында зерделенген шешімдер мен технологиялар алынды. Сол кезде өңір өкілдері салалық кәсіпорындардың жұмысымен, өндірістік қуаттарымен және модульдік тұрғын үй құрылысы саласындағы инновациялық тәсілдерімен танысты.
Бүгінде қол жеткізілген келісімдер нақты өндіріс ретінде жүзеге асырылды. Кіші индустриялық парктің ғимараттарының бірінде BNK Group компаниясы шетелдік серіктесімен бірлесіп «KHAN TAU» брендімен капсулалық эко-үйлер мен жаңа буын модульдік құрылымдардың өндірісін іске қосты.
Капсулалық үйлер қайда қолданылады
Өндірілетін құрылымдар кең ауқымды мақсаттарға арналған. Оларды:
- туристік кешендер мен глэмпингтерде,
- мобильді тұрғын үй және кеңсе ретінде,
- көрме алаңдары мен уақытша павильондарда,
- қонақ үй бизнесінде,
- далалық зертханалар мен инфрақұрылымдық нысандарда,
- пайдалану жоспарланып отыр.
Жобалау және құрастыру барысында заманауи технологиялар қолданылады. Бұл ұзақ монтажды қажет етпейтін, энергия үнемдейтін, мобильді және пайдалануға толық дайын смарт-құрылыстарды шығаруға мүмкіндік береді.
Түркістанда қазақ стиліндегі киіз үйлерден қонақ үй салынып, символикалық алаң жасалады
Өндірістік көлемдер мен даму жоспарлары
Кәсіпорынның жобалық қуаты жылына 200 бірлікке дейін дайын өнім шығаруға жетеді. Смарт-нысандарды ішкі туризмді дамытуда, туристік кластерлерді қалыптастыруда, елді мекендерді абаттандыруда және әлеуметтік жобаларды іске асыруда кеңінен қолдану көзделіп отыр.
Бастама сондай-ақ өңірде жоғары технологиялық өндірісті дамытуға, инвестиция тартуға және заманауи құрылыс шешімдерін енгізуге бағытталған.
Пәтерге ақша жинау оңайырақ болады: жекеменшік банктер тұрғын үй жинақ жүйесіне кіруде
Жеке бағыт – сэндвич-панельдер өндірісі
Сонымен қатар BNK Group сэндвич-панельдер өндірісін де жолға қойды. Бұл үшін кәсіпорын базасында жоғары технологиялық өндірістік желі пайдалануға берілді. Оның қуаттылығы тәулігіне 1 000 шаршы метрге дейін өнім шығаруға мүмкіндік береді.
Бұл құрылыс және инфрақұрылымдық жобаларды жергілікті өндірістің сапалы материалдарымен жедел қамтамасыз етуге жағдай жасайды. Сэндвич-панельдер жылу оқшаулау, энергия тиімділігі, беріктік, ұзақ мерзімділік және өрт қауіпсіздігі бойынша заманауи талаптарға толық сәйкес келеді.
Өңір үшін экономикалық әсер
Жаңа өндірістердің іске қосылуы аймаққа айтарлықтай әлеуметтік-экономикалық әсерін тигізді. Нәтижесінде 30-ға дейін тұрақты жұмыс орны құрылды. Жоба жергілікті өндірісті дамытуға, импортты алмастыруға және құрылыс саласын қолжетімді әрі сапалы материалдармен қамтамасыз етуге ықпал етеді.
Кіші индустриялық парк нысандарын аралау барысында облыс әкімі жаңа өндірістерді жедел орналастыруды және инвестициялық жобаларды іске асыруды жандандыруды тапсырды.
Отбасы банкінде депозит аудару – бұл не, кімге қажет және оны қалай жасауға болады
Индустриялық парктер – өсім нүктесі
Айта кету керек, Түркістан қаласына жақын аумақта 100 гектар жерді қамтитын кіші индустриялық парк жобасы жүзеге асырылуда. Жоба аясында 152 өндірістік ғимарат салу және 6 мыңнан астам жұмыс орнын құру жоспарланған.
Алғашқы кезеңде 40 нысан салынды, 32 жоба іске қосылды және 1 220 адам жұмыспен қамтылды. Сонымен қатар әрбір 1 теңге бюджет қаражатына 8,5 теңге жеке инвестиция тартылды.
Жалпы Түркістан облысы бойынша 21 шағын өндірістік алаң құрылуда. Басым бағыттар ретінде құрылыс материалдары, жиһаз, пластик пен резеңке бұйымдары, химиялық өнімдер және жеңіл өнеркәсіп өндірісі айқындалды. Қазіргі таңда бірқатар кәсіпорындар жиһаз, суару жүйелері, сусындар, тоңазытқыш жабдықтар және өзге де өнімдерді шығара бастады.
Жылжымайтын мүлік нарығындағы өзекті жаңалықтарды қадағалап, сату туралы хабарландыруларды орналастырып және армандаған пәтеріңізді ыңғайлы homsters қосымшасынан таба аласыз.
