Шымкентте қомақты қаражат жинамай-ақ және стандартты ипотеканы рәсімдемей-ақ пәтер сатып алуға мүмкіндік беретін тұрғын үй бағдарламасы іске қосылды. Қазақстан тұрғын үй компаниясы Отбасы банкпен бірлесіп, Тұран шағынауданындағы пайдалануға дайын 18 пәтерге өтінім қабылдауды бастады. Ұсыныстың басты артықшылығы — жылдық 3,1% мөлшерлемемен бастапқы жарнасыз баспана алу мүмкіндігі. Қатысушылар пәтерге бірден қоныстанып, оның құнын біртіндеп төлей алады және кейіннен баспананы өз меншігіне рәсімдейді. Алайда бағдарлама барлық ниет білдірушілерге қолжетімді емес. Пәтер алуға кімдер үміткер бола алатынын, ай сайын қанша төлеу керектігін және 2026 жылғы 28 қазанға дейін өтінімді қалай беруге болатынын түсіндіреміз.
«Наурыз» бойынша пәтер алуға үлгермедіңіз бе? Мерзім жыл соңына дейін ұзартылды
3,1%-бен берілетін пәтерлер: баспана қанша тұрады және қандай шарттар ұсынылады
Кәдімгі ипотекадан айырмашылығы, жаңа бағдарлама тұрғын үйді кейіннен сатып алу құқығымен жалға беруді қарастырады. Қазақстан тұрғын үй компаниясы пайдалануға дайын пәтерді ұсынады, ал қатысушы ай сайын белгіленген төлемді төлейді. Шарт бойынша барлық міндеттемелерді орындағаннан кейін баспана оның меншігіне өтеді.
Бұл ретте жалға алудың ең ұзақ мерзімі 20 жылды, ал сыйақы мөлшерлемесі жылдық небәрі 3,1%-ды құрайды. Сонымен қатар бағдарлама пәтерді қалдық құны бойынша мерзімінен бұрын сатып алуға мүмкіндік береді.
Тұран шағынауданында таза әрлеуі бар барлығы 18 пәтер ұсынылады. Барлық нысан қоныстануға дайын. Сондықтан болашақ тұрғындарға құрылыс аяқталғанша күтудің қажеті жоқ.
Төлем мөлшері бөлме саны мен пәтердің ауданына байланысты:
- Бір бөлмелі — 3 пәтер. Ауданы 41,5-тен 42,5 м²-ге дейін, ай сайынғы төлемі 103 152 теңгеден 105 638 теңгеге дейін.
- Екі бөлмелі — 4 пәтер. Ауданы 53,3-тен 58,8 м²-ге дейін, ай сайынғы төлемі 132 481 теңгеден 146 152 теңгеге дейін.
- Үш бөлмелі — 11 пәтер. Ауданы 64,6-дан 74,7 м²-ге дейін, ай сайынғы төлемі 160 568 теңгеден 185 673 теңгеге дейін.
Осылайша, жалдау төлемінің ең төменгі мөлшері айына 103 мың теңгеден басталады. Бұл ретте бірыңғай тариф бір шаршы метр үшін 2 485,58 теңгені құрайды.
Бағдарламаның маңызды артықшылығы — бастапқы жарнасыз қоныстану мүмкіндігі. Алайда алғашқы жарнаның болмауы қатысушыны ай сайынғы қаржылық міндеттемелерден босатпайды.
Тұрғын үйдің қолжетімділігін қайта есептеуі мүмкін: орташа жалақыға күмән туды
Жинақсыз пәтерді кімдер ала алады
Тартымды шарттарына қарамастан, бұл ұсынысты азаматтардың белгілі бір санаттары ғана пайдалана алады. Бағдарлама Шымкент қаласында тұрғын үйге мұқтаж ретінде ресми есепте тұрған Қазақстан азаматтары мен қандастарға арналған.
Сонымен қатар үміткер бірнеше талапқа сай болуы тиіс:
- Кемінде алты ай үздіксіз еңбек өтілінің болуы.
- Ай сайынғы төлемдерді төлеуге жеткілікті қаржылық қабілетін растауы.
- Өтінім қаралған сәтте мерзімі өткен берешегінің болмауы.
Бұл ретте тұрғын үй кезегінде тұру пәтердің автоматты түрде берілетініне кепілдік бермейді. Қазақстан тұрғын үй компаниясы қатысушылардың қаржылық мүмкіндіктерін қосымша бағалап, содан кейін ғана шешім қабылдайды.
7-20-25 ипотекасы: Қазақстанда 2026 жылға арналған қаржыландырудың соңғы лимиті бөлінді
Өтінімді қалай беруге болады және құжаттар қай күнге дейін қабылданады
Өтінім қабылдау 9 қазанда басталды және 2026 жылғы 28 қазанды қоса алғанда жалғасады. Бағдарламаға қатысу үшін банк бөлімшесіне барудың қажеті жоқ: негізгі рәсімдерді онлайн орындауға болады.
Үміткер Baspana Market порталына кіріп, жеке кабинетінде авторизациядан өтуі керек. Одан кейін «Арендное жильё АО „КЖК“» бөлімін ашып, Шымкент қаласындағы ұсынысты таңдап, жүйенің нұсқауларына сәйкес өтінім жіберуі қажет.
Қатысушыларды іріктеу 29 қазанға жоспарланған. Іріктеу аяқталғаннан кейін Отбасы банк үміткерлердің тізімін қалыптастырып, Қазақстан тұрғын үй компаниясына жолдайды. Өз кезегінде компания олардың төлем қабілетін тексеріп, пәтерлердің кімдерге берілетінін анықтайды.
Қосымша ақпаратты мына телефон нөмірлері арқылы алуға болады:
- 8 (800) 080-44-48
- +7 (7172) 79-75-75
Бағдарлама аясында небәрі 18 пәтер ұсынылғандықтан, қатысуға ниетті азаматтарға тұрғын үй кезегіндегі мәртебесін алдын ала тексеріп, табысын растайтын мәліметтерді дайындаған жөн. Тұрақты табысы бар, бірақ қомақты жинағы жоқ отбасылар үшін бұл бастапқы жарнасыз біртіндеп өз баспанасын сатып алудың тиімді мүмкіндігі.
