Алматы облысындағы Алатау қаласында енді тегін 10 сотық жер берілмейді. Бұл жеке тұрғын үй құрылысына (ЖТҚ) арналған жер учаскелеріне қатысты. Алайда бұрын кезекке тұрған азаматтар басқа елді мекенде өз кезегін қалпына келтіре алады. Жер учаскелерін беру тәртібі неге өзгергенін және кезекте тұрғандар не істеуі керектігін қарастырамыз.
Алматының жаңартылған бас жоспары күшіне енді: 2040 жылға дейін қалада қандай өзгерістер болады
Алатауда тегін жер беру неге тоқтатылды?
Жер учаскелерін берудің тоқтатылғаны туралы Алматы облысы жер қатынастары басқармасының басшысы Аманжол Абдрахманов мәлімдеді.
Бұған «Алатау қаласының арнаулы құқықтық режимі туралы» заңда көзделген шектеулер себеп болды. Атап айтқанда, қала аумағында және оның қала маңындағы аймағында жеке тұрғын үй құрылысына жаңа жер учаскелерін беруге тыйым салынған. Сонымен қатар бұл шектеу саяжай құрылысына да қатысты.
Осылайша, Алатауда тегін 10 сотық жер беруді қайта бастау жоспарланбайды.
10 сотық жер кезегінде тұрған азаматтар не істейді?
Кейбір азаматтар елді мекендердің мәртебесі өзгергенге дейін кезекке тұрған. Енді олар басқа елді мекенде өз кезегін қалпына келтіре алады.
Ол үшін жергілікті атқарушы органға жүгіну қажет. Сондай-ақ өтініш, жеке куәлік және бастапқыда кезекке тұрғанын растайтын құжат ұсынылуы тиіс.
Бұл ретте алғаш рет кезекке тіркелген күн сақталады. Алайда кезекті қалпына келтіру жер учаскесін бірден алуға кепілдік бермейді.
Сондай-ақ оқыңыз: Алатау қаласы Алматы агломерациясының құрамына енгізілді: не өзгерді
Жылжымайтын мүлік пен тұрғын үй нарығындағы басты жаңалықтар — Homsters қосымшасында






