Алдағы жылдары елордадағы тұрғын үй құрылысының аумағы айтарлықтай кеңейеді. Негізгі өсім бос аумақтарды игеру есебінен қамтамасыз етіледі. Сонымен қатар билік бұрыннан игерілген аудандарды жаңартуға кіріседі. Астана құрылысы жолдарды, инженерлік желілерді және қала маңындағы инфрақұрылымды дамытумен қатар жүреді. 2035 жылға дейін қалада шамамен 30 млн шаршы метр жаңа тұрғын үйді пайдалануға беру жоспарланып отыр.
Елорда мен Ақмола облысының билігі жаңа мәліметтерді Tengrinews.kz сауалына берген жауабында хабарлады. Атап айтқанда, жаңа құрылыс қай аудандарда жүргізілетіні, газ, су және электр желілері қай елді мекендерге тартылатыны, сондай-ақ экологиялық қалашықтар жобаларының қазіргі жағдайы белгілі болды.
Нейрожелі пәтер таңдап, ипотеканы есептейді: болашақ жақын қалды
Жаңа тұрғын үйлер қай жерде салынады
Сол жағалауда елорда негізінен оңтүстік бағытта — Нұра және Есіл аудандарында кеңейеді. Ал оң жағалауда Алматы және Сарайшық аудандарындағы жаңа аумақтарды белсенді игеру жоспарланған.
Сонымен қатар қолданыстағы құрылыстың бір бөлігі реновациядан өтеді. Тізімге Асан Қайғы көшесінің бойындағы аумақтар, Шұбар ауданы, Көктал және Лесозавод тұрғын алаптары, Пригородный тұрғын алабындағы саяжайлардың бір бөлігі, сондай-ақ Кенесары және Мәскеу көшелеріндегі жеке сектор кірді.
Бас жоспарды іске асырудың бірінші кезеңі 2030 жылға дейін, ал екінші кезеңі 2031–2035 жылдарға есептелген. Жаңа тұрғын үйлердің басым бөлігін 6–12 қабатты үйлер құрайды. Жекелеген аумақтарда биік ғимараттар, орта және аз қабатты үйлер, сондай-ақ коттедждер салынады.
Бұдан бөлек, Астана құрылысы көлік инфрақұрылымын одан әрі дамытумен байланысты. LRT-ның екінші кезеңін Қарқаралы көшесінен Қосшы қаласына дейін ұзарту жоспарланып отыр.
Қала маңында не өзгереді
2026 жылы елорда маңындағы коммуналдық инфрақұрылым құрылысы жалғасады. Ключи ауылында сумен жабдықтау желілерін, ал Қостомар, Қоянды және Қаражар ауылдарында электрмен жабдықтау желілерін аяқтау жоспарланған. Қаражар, Қараөткел және Қызылсуат ауылдарына газ желілері тартылады. Қосшыда да тиісті жұмыстар жалғасады.
Сонымен бірге Қызылсуатта су құбыры, Қосшыда электр желілері, ал Тайтөбеде газ желілері салынып жатыр. Бірқатар елді мекенде жолдар жөнделуде.
2027–2028 жылдары сумен, жылумен және электрмен жабдықтау нысандарын, сондай-ақ жолдарды салуға және қайта жаңғыртуға тағы 145,6 млрд теңге бөлу жоспарланған. Бұдан бөлек, 13 елді мекендегі жолдарды күрделі жөндеуге 9,9 млрд теңге бағыттау көзделіп отыр.
Тұрғын үйді бөлу тәртібі жаңарды: Қазақстанда кімдердің баспана алу мүмкіндігі айтарлықтай артты
Қосшыдағы экологиялық қалашық неге әзірге салынбайды
Қосшыдағы экологиялық қалашық жобасының жүзеге асуы жер мәселесіне байланысты қиындады. Құрылыс үшін сатып алу жоспарланған жер телімі банкте кепілде болған, кейін оны басқа меншік иесі сатып алған. Енді билік бұл алаңда жобаны жүзеге асыру мүмкін емес екенін мәлімдеді.
Екінші экологиялық қалашықты Астанадағы Майбалық көлінің маңында дамыту жоспарланып отыр. Қазір бұл аумақ үшін егжей-тегжейлі жоспарлау жобасы әзірленуде. Құжат аумақты одан әрі игерудің негізгі параметрлерін айқындайды.
Осылайша, 2035 жылға дейін Астана құрылысы жаңа аумақтарды да, қолданыстағы аудандарды да қамтиды. Сонымен қатар билік елордаға жақын орналасқан елді мекендердің инфрақұрылымын дамытуды жоспарлап отыр.
Сондай-ақ оқыңыз: 2% және 5% ипотеканың жаңа ережелері: жеңілдетілген қарызды кім ала алады
Жылжымайтын мүлік туралы өзекті жаңалықтар мен пайдалы материалдар Homsters қосымшасында қолжетімді
