Қазақстанда құрылыс материалдары өндірісі 1500 жаңа жұмыс орнын ашады
2025 жылы Қазақстанда «Құрылыс материалдары өндірісі» саласын дамытуға баса назар аударылуда. Қазірдің өзінде құны 25,6 млрд теңгені құрайтын 11 жоба жүзеге асырылып, 562 тұрақты жұмыс орны қамтамасыз етілді. Бұл туралы Индустрия және құрылыс министрлігі хабарлады.
QazIndustry мәліметінше, қазақстандық кәсіпорындар минералды оқшаулау, еден плиталары, плитка, кірпіш, асфальт-бетон және басқа да құрылыс материалдарының өндірісін жолға қойған. Осылайша, құрылыс материалдарын өндіру ішкі нарықты нығайтуға септігін тигізеді.
Жыл соңына дейін елімізде тағы 32 жобаны іске қосу жоспарлануда. Жалпы инвестиция көлемі 62 млрд теңгені құрайды. Бұл бастамалар 1500-ге жуық жұмыс орнын құруға мүмкіндік береді. Тізімге керамикалық плиткалар, сэндвич-панельдер, ПВХ бұйымдары, алюминий қасбеттері, терезелер, есіктер, жылу оқшаулағыш материалдар мен керамзит өндірісі бойынша желілер кіреді.
Толық өндіріс көлеміне көшу 22,9 млрд теңгенің өнімін шығаруды қамтамасыз етеді. Бұл отандық құрылыс секторы қажеттіліктерінің айтарлықтай бөлігін өтейді.
Сонымен қатар, 2026-2028 жылдарға есептелген 58 жаңа жоба белсенді іске асыру сатысында. Олардың жалпы құны 414 миллиард теңгеден асады. Бұл жобалар 6,7 мыңнан астам жұмыс орнын құруға мүмкіндік береді. Бұл ретте оның 3 мыңға жуығы ауылдық жерлерде.
Сондай-ақ құны 531 миллиард теңгеден асатын тағы 51 инвестициялық бастама әзірленуде. Олар республика бойынша 7,3 мыңнан астам жұмыс орнын қамтамасыз етуге қауқарлы.
Жалпы, Қазақстанда құрылыс материалдарын өндіру саласында 141 жоба жүзеге асырылуда. Олардың жалпы бюджеті шамамен 1 триллион теңгені құрайды. Олар сәтті жүзеге асса, 15,5 мыңнан астам жұмыс орны құрылады, оның ішінде 7 мыңы ауылдық жерлерде.
Жоспарланған жалпы өнім көлемі 871,6 млрд теңгені құрайды. Оның 148,2 миллиардын экспортқа шығару жоспарланған. Импортты алмастыратын өнімдер 723,4 млрд теңгені құрайтын орынды алады.
Осылайша, құрылыс материалдарын өндіру Қазақстандағы жұмыспен қамтудың және өнеркәсіптік өсудің негізгі драйверіне айналуда.
