Қазақстанда тұрғын үй жобаларындағы үлестерді кепілге қоюдың жаңа қағидалары бекітілді. Енді мұндай қызметті рәсімдеу тәртібі тұрғын үй құрылысына үлестік қатысудың бірыңғай ақпараттық жүйесі арқылы жүргізіледі. Бұл көппәтерлі тұрғын үйлерге және жеке тұрғын үйлер кешендеріне қатысты.
Не өзгереді
Үлестер кепілін тіркеу мемлекеттік қызметке айналады. Өтініш беруші цифрлық жүйе арқылы электрондық өтінім бере алады. Оған қажетті құжаттарды қоса тіркеу керек.
Бастапқы тіркеу үшін өтініш пен кепіл шартының электрондық нұсқасы қажет. Егер тараптар шарт талаптарын өзгертсе, олар өтінім мен электрондық қосымша келісімді ұсынады.
Сонымен қатар, жаңа нормалар кепілді тоқтатуды және техникалық қателерді түзетуді реттейді. Бұл ретте барлық әрекетке ортақ қағида қолданылады. Өтініш беруші электрондық өтінім береді, қажетті құжаттарды тіркейді және нәтижені цифрлық жүйе арқылы алады.
Рәсім қалай өтеді
Жүйе өтінімді түскен күні тіркейді. Содан кейін қызмет көрсетуші құжаттарды тексереді. Бұған бір жұмыс күні беріледі.
Егер құжаттар толық болып, мәліметтер дұрыс көрсетілсе, шарт жүйеде тіркеледі. Осыдан кейін өтініш беруші жеке кабинетіне үзінді көшірме алады. Сондай-ақ ол кепіл берушінің электрондық поштасына жіберіледі.
Құжаттар толық ұсынылмаса, бас тартылуы мүмкін. Сондай-ақ құжаттардың қолданылу мерзімі өтіп кетсе, өтініш қабылданбайды. Егер мәліметтерде сәйкессіздік анықталса, қызмет көрсетуші дәлелді бас тарту жібереді.
Бұйрықтың негізгі бөлігі 2026 жылғы 10 мамырдан бастап күшіне енеді. Ал жекелеген нормалар кейінірек, яғни 2026 жылғы 12 шілдеден бастап қолданыла бастайды.
Жаңа рәсімдеу тәртібі процесті ашық ете түседі. Ол тұрғын үй құрылысына қатысушыларға үлестер кепілін ресми тіркеуге және растаушы құжаттарды жылдам алуға көмектеседі.
Сондай-ақ оқыңыз: Жылжымайтын мүлік нарығы жаңа кезеңге өтіп жатыр — сарапшылар пікірі
Жылжымайтын мүлік туралы барлық жаңалықтар, сондай-ақ жаңа тұрғын үй кешендеріне шолулар мен тиімді ұсыныстар — біздің Homsters қосымшасында
