Осы айда Қазақстанда әйелдерге арналған «Ұмай» ипотекасы қайта іске қосылуы тиіс. Отбасы банк бағдарламаның қайта басталатынын растады және өтінім қабылдау тамыз айында басталатынын хабарлады. Конкурстық іріктеу қарастырылмаған: өтінімдер келіп түсу ретіне қарай қаралады. Сондықтан бағдарламаны пайдалануды жоспарлап отырған әйелдер қазірден бастап табысын тексеріп, кредиттік жүктемесін бағалап, бастапқы жарнасын дайындағаны жөн. Әйдерге арналған ипотекаға сауатты дайындалу негізгі кезеңдерден жылдамырақ өтуге және бас тарту қаупін азайтуға көмектеседі.
Бағдарлама бастапқы және қайталама нарықтан тұрғын үй сатып алуға мүмкіндік береді. Сонымен қатар меншігінде басқа жылжымайтын мүліктің болуы «Ұмай» бағдарламасына қатысуға кедергі келтірмейді. Қажет болған жағдайда қарыз алушы екі қоса қарыз алушыға дейін тарта алады.
Korkem жинақтаушы ипотекасына сұраныс жоғары: ол сатып алушыларды несімен қызықтырды
«Ұмай» ипотекасын кімдер рәсімдей алады
Ең алдымен бағдарламаның негізгі талаптарына сәйкестікті тексерген жөн. Қарызды 18 жастан 65 жасқа дейінгі әйелдер ала алады. Бұл ретте кемінде соңғы алты айда ресми табыс пен зейнетақы аударымдары болуы қажет.
Сондай-ақ банк отбасының жиынтық айлық табысын ескереді. Ол 1,25 млн теңгеден аспауы тиіс. Сонымен қатар әлеуетті қарыз алушы өзінің төлем қабілеттілігін растауы керек. Бағдарлама арқылы сатып алынған немесе жөнделген тұрғын үй тұру үшін пайдаланылуы тиіс.
Кредиттің ең жоғары сомасы 50 млн теңгені құрайды. Егер қаражат тек тұрғын үйді жөндеуге қажет болса, 15 млн теңгеге дейін алуға болады.
Бастапқы жарнаның мөлшері өңірге байланысты. Алматы мен Астанада банк тұрғын үй құнының 80%-на дейін қаржыландырады, сондықтан сатып алушы қалған 20%-ын өзі төлеуі керек. Басқа өңірлерде қаржыландыру көлемі 85%-ға дейін жетуі мүмкін. Тиісінше, жылжымайтын мүлік құнының кемінде 15%-ын өз қаражаты есебінен жабу қажет.
Осылайша, өтінім бермес бұрын болашақ тұрғын үйдің шамамен қанша тұратынын анықтап, қажетті жеке қаражат көлемін есептеп алған жөн.
Қазақстанда отандық өндіріс күшейтілуде: бұл құрылыс саласы үшін нені білдіреді
Ресми табысты алдын ала тексеріңіз
Ипотеканы мақұлдаудың негізгі шарттарының бірі — расталған төлем қабілеттілігі. Сондықтан дайындықты пәтер іздеуден емес, өз қаржылық жағдайыңызды бағалаудан бастаған дұрыс.
Бағдарлама кемінде алты ай бойы ресми табыс пен зейнетақы аударымдарының болуын талап ететіндіктен, олардың тұрақты түскенін алдын ала тексерген жөн. Егер жұмыс беруші аударымдарды кешіктіріп жүргізсе немесе ұзақ үзілістер болса, бұл мәселені өтінім бергенге дейін анықтап алған дұрыс.
Сонымен қатар табыстың белгіленген ең жоғары шекке сәйкестігін ғана бағалау жеткіліксіз. Банк ипотека рәсімделгеннен кейін қарыз алушының ай сайынғы төлемдерді тұрақты төлей алатынына көз жеткізуі тиіс.
Сондықтан «Ұмай» ипотекасына дайындалу кезінде отбасы бюджетіне түсетін болашақ жүктемені есептеу қажет. Таңдалған пәтердің құны отбасының табысына қаншалықты сәйкес келсе, кредитті өтеу мүмкіндігін растау да соншалықты оңай болады.
Алматы тұрғындары үшін МИБ және ПИК мәселелері бойынша тегін консультациялар өткізіледі
Қолданыстағы кредиттерді реттеңіз
Табыстың едәуір бөлігі басқа міндеттемелерге жұмсалса, тұрақты жалақының өзі жеткіліксіз болуы мүмкін. Тұтынушылық кредиттер, бөліп төлеу және басқа қарыздар жалпы борыштық жүктемеге әсер етеді.
Сондықтан ипотекаға өтініш бермес бұрын қолданыстағы міндеттемелерді тексерген пайдалы. Егер бастапқы жарна мен қаржылық резервке зиян келтірмей шағын кредитті немесе бөліп төлеуді жабу мүмкіндігі болса, бұл ай сайынғы жүктемені азайтуға көмектеседі.
Алайда мерзімінен бұрын өтеу үшін барлық жинақты жұмсаудың да қажеті жоқ. Бағдарламаға қатысу үшін бастапқы жарна қажет, ал пәтер сатып алғаннан кейін қосымша шығындар пайда болады.
Сонымен қатар кредиттік тарихты да тексерген жөн. Деректердегі қателерді немесе бұрыннан реттелмеген міндеттемелерді ипотекалық өтінімді қарау кезінде емес, алдын ала анықтаған дұрыс.
2026 жылы Қазақстанда тұрғын үй кезегіне қалай тұруға болады: қадамдық нұсқаулық
Бастапқы жарнаны дайындаңыз
Бағдарламаға қатысу үшін жеке жинақ белгіленген бастапқы жарнаны төлеуге жеткілікті болуы керек. Мысалы, Алматы немесе Астанада құны 30 млн теңге болатын пәтер сатып алғанда кемінде 6 млн теңге жеке қаражат қажет. Ал басқа өңірде бастапқы жарна 15% болған жағдайда дәл осындай пәтер үшін 4,5 млн теңге қажет болады.
Бұл ретте тек ең төменгі сомаға ғана сүйенбеген дұрыс. Бастапқы жарнадан бөлек, жылжымайтын мүлік сатып алу кезінде бағалау, құжаттарды рәсімдеу, көшу және басқа да қосымша шығындар туындауы мүмкін.
Бағдарлама талаптары бастапқы жарнаға арналған қаражатты Отбасы банктегі депозитке орналастыруды да қарастырады. Қарыз мақұлданғаннан кейін қатысушы тұрғын үй құнының өзіне тиесілі бөлігін сатушыға аударады.
Сондықтан қажетті соманы өтінім берер алдында асығыс жинауға тырыспай, қаражатты алдын ала дайындаған жөн.
Тұрғын үйге мемлекеттік қолдау: 15 тамыздан бастап не өзгереді
Қаржылық мүмкіндігіңіздің шегіндегі пәтерді таңдамаңыз
«Ұмай» бағдарламасы бойынша қарыздың ең жоғары сомасы 50 млн теңгеге жетеді. Алайда бұл әрбір қатысушы дәл осындай соманы ала алады дегенді білдірмейді. Кредиттің нақты мөлшері расталған төлем қабілеттілігіне де байланысты болады.
Сондықтан алдымен қолжетімді бюджетті анықтап, содан кейін ғана пәтер іздеген қауіпсіз. Мысалы, қымбат тұрғын үйге қызмет көрсету отбасының табысына тым жоғары жүктеме түсірсе, арзанырақ нұсқаны қарастырған немесе бастапқы жарнаны көбейткен жөн.
Мұндай тәсіл кредит рәсімделгеннен кейін де маңызды. Ипотекалық төлемнен кейін отбасында коммуналдық қызметтерге, азық-түлікке, көлікке, күтпеген шығындарға және басқа да міндетті төлемдерге жеткілікті қаражат қалуы керек.
Қажет болса, қоса қарыз алушыларды тартыңыз
Бағдарламаның артықшылықтарының бірі — екі қоса қарыз алушыға дейін тарту мүмкіндігі. Бұл әсіресе қажетті кредит сомасын алу үшін жеке расталған табыс жеткіліксіз болған жағдайда өзекті.
Алайда қоса қарыз алушыны алдын ала таңдаған дұрыс. Өтінімді қарау кезінде оның қаржылық жағдайы да маңызды рөл атқарады. Сондықтан қарызға тартылатын адамның ресми табысын, қолданыстағы кредиттерін және басқа міндеттемелерін ескеру қажет.
Сонымен қатар қаржылық жауапкершілікті алдын ала талқылау маңызды. Ипотека ұзақ мерзімге рәсімделетіндіктен, қоса қарыз алушының қатысуы тек үлкенірек сома алу үшін жасалған формалдылық болмауы тиіс.
Құжаттарды бағдарлама басталғанға дейін дайындаңыз
«Ұмай» бағдарламасында конкурстық іріктеу қарастырылмағандықтан, өтінімдер келіп түсу ретіне қарай қаралады. Сондықтан дайындықтың бір бөлігін алдын ала аяқтаған жөн.
Жеке куәліктің жарамдылық мерзімін, табыс пен зейнетақы аударымдары туралы мәліметтерді, депозиттің жағдайын және қолданыстағы кредиттер туралы ақпаратты тексеру керек. Егер қоса қарыз алушыны тарту жоспарланса, оның құжаттары мен қаржылық деректерін де алдын ала дайындаған дұрыс.
Сонымен бірге өз төлем қабілеттілігіңіз туралы алдын ала түсінік қалыптаспай тұрып, нақты пәтерді сатып алуға асықпаған жөн. Алдымен қандай қаржыландыру сомасына үміттенуге болатынын анықтап, содан кейін тиісті баға санатындағы тұрғын үйді таңдаған дұрыс.
Өтінім бермес бұрын не істеу керек
«Ұмай» ипотекасына дайындықты бірнеше негізгі қадамға бөлуге болады:
- кемінде алты ай бойы ресми табыс пен зейнетақы аударымдарының болғанын тексеру;
- отбасының жиынтық табысы бағдарлама талаптарына сәйкес келетініне көз жеткізу;
- кредиттік тарих пен қолданыстағы міндеттемелерді тексеру;
- мүмкіндігінше артық борыштық жүктемені азайту;
- Алматы мен Астанада тұрғын үй сатып алу үшін оның құнының кемінде 20%-ын, ал басқа өңірлерде кемінде 15%-ын жинау;
- бастапқы жарнадан бөлек қаржылық резерв қалдыру;
- пәтердің өзіңізге қолайлы құнын алдын ала анықтау;
- қажет болған жағдайда қаржылық жағдайы тұрақты бір немесе екі қоса қарыз алушыны таңдау;
- негізгі құжаттарды дайындап, өтінім қабылдаудың басталуы туралы хабарландыруды қадағалау.
«Ұмай» ипотекасы осы айда қайта іске қосылуы тиіс, сондықтан өтінім қабылдау басталғанға дейін дайындықты кейінге қалдырмаған жөн. Әлеуетті қарыз алушы өз қаржылық мүмкіндіктерін неғұрлым ертерек бағалап, құжаттарын ретке келтірсе, бағдарлама іске қосылғаннан кейін рәсімдерден өту соғұрлым оңай болады.
Сондай-ақ оқыңыз: Жасыл ипотекаға өтінімді қалай беруге және мақұлдауға болады
Жылжымайтын мүлік туралы пайдалы ақпарат, соңғы жаңалықтар мен өзекті ұсыныстар — Homsters қосымшасында
